კვირა 3

kur sul kuri project 3 :)

როდესაც ამ კვირის გეგმებზე დავიწყეთ ფიქრი, ჩამოვწერეთ ჩვენი აქტივობების სია :

1. სპონსორის მოძიება
2. "წიგნის ფესტივალი 2012"
3. როტარაქტ კლუბი "ახალი თაობა"–ს დაჯილდოვება
4. ბაკურ სულაკაურის გამომცემლობის წიგნები ზღვის დონიდან 2200 მეტრზე
5. ბაკურ სულაკაურის გამომცემლობის PR კამპანია ღვთაებაში
6. რეკლამა "ბაკურ სულაკაურის გამომცემლობა XXI საუკუნის კუპიდონი"

#1 აქტივობა : 22 მაისს ვესტუმრეთ საიუველირო მაღაზია "სოფიას". ეს მაღაზია სახელგანთქმულია ულამაზესი სამკაულებით. აქ ქალთათვის ნამდვილი სამოთხეა. მაღაზიამ მარი ბექაურისთვის გამოყო საიუველირო ნაწარმი დოლჩე და კარწიეს კატალოგიდან, ასევე ფასდაკლების ბარათი. მაღაზიის მფლობელმა ქალბატონმა სოფიკო ბეგაშვილმა დიდი დახმარება გაგვიწია, რისთვისაც გუნდი "იგრძენი წიგნის გულისცემა" მადლობას უხდის მას.


#2 აქტივობა :

25 მაისს გაიმართა 15 საუკეთესო პროზის ავტორის დაჯილდოვება ,, წიგნის ფესტივალი 2012 „ –ზე, რომელზეც ბაკურ სულაკაურის გამომცემლობის პროექტ ,,წიგნების თაობა’’ მონაწილე გუნდმა ,,იგრძენი წიგნის გულისცემა’’დააჯილდოვა ფავორიტი მწერალი, მარი ბექაური და გადასცა საიუველერიო მაღაზია ,,სოფიას’’ მიერ დაწესებული საჩუქარი და ფასდაკლების ბარათი.

პროექტის ,,წიგნების თაობა’’ მონაწილე გუნდებს შორის ,,იგრძენი წიგნის გულისცემა’’ პირველი იყო,რომელიც გამოჩნდა სცენაზე და აღარ ეღირსა ჩასვლა :) უყურადღებოდ არ დარჩენილა ის ფაქტი,რომ ამ გუნდის ორი წევრი აფხაზეთიდან იმყოფება და რომ მათი დახმარებით ბაკურ სულაკაურის გამომცემლობამ აფხაზეთშიც ჩააღწია.

გამოსვლაზე კიდევ ერთხელ ხმამაღლა გაიჟღერა არასამთავრობო ორგანიზაციის ,,ჰელფინგ ჰენდის’’ სახელმა,რომლის მოხალისეები აქტიურად უდგას მხარში გუნდს.

ჩვენი გუნდის გამოსვლა იმდენად ეფექტური იყო, რომ თვით ბაკურ სულაკაურმა და მისი გამომცემლობის თანამშრომლებმაც კი გამოგვიჭირეს და გადაიღეს ჩვენთან სურათები :) :) :) (რათქმაუნდა ხუმრობით)

#3 აქტივობა :

"იგრძენი წიგნის გულისცემა" მიწვეული იყო "როტარაქტ კლუბი ახალი თაობა"–ს დაჯილდოვებაზე, სადაც სამ გამარჯვებულს გადავეცით ბაკურ სულაკაურის გამომცემლობის ფასდაკლების ბარათები და წიგნები: დათო ტურაშვილის – "ტიბეტი არ არის შორს", ლაშა ბუღაძის – "ბოლო ზარი" და აკა მორჩილაძის – "აგვისტოს პასიანსი".

დამსწრეთა შორის იყვნენ "როტარაქტ კლუბის" წევრები, მოსწავლეები და პედაგოგები, რომლებსაც მივაწოდეთ ინფორმაცია ბაკურ სულაკაურის გამომცემლობაზე და პროექტ "წიგნების თაობაზე". ღონისძიების დასრულების შემდეგ ჩვენმა მოხალისეებმა დაარიგეს ფლაერები და უპასუხეს ყველა კითხვას, რაც ჩვენს გუნდთან დაკავშირებით ჰქონდათ.

#4 აქტივობა :

პროექტის ,,წიგნების თაობა’’ მონაწილე გუნდმა ,,იგრძენი წიგნის გულისცემა ’’ბაკურ სულაკაურის გამომცემლობის წიგნები ზღვის დონიდან 2200 მეტრზე აიტანა და იქ გამართა წიგნის კითხვის პიარკამპანია.

26 მაისს ,,იგრძენი წიგნის გულისცემა’’ ყაზბეგს ესტუმრა.გუნდმა ვიზიტორებში დაარიგა ფლაერები და კიდევ ერთხელ გაუწია წიგნის კითხვას პროპაგანდა.აღსანიშნავია, რომ ,,იგრძენი წიგნის გულისცემას’’ აქტიურად უდგას მხარში არასამთავრობო ორგანიზაცია ,,ჰელფინგ ჰენდი’’ და მისი მოხალისეები. მათი დახმარებით ბაკურ სულაკაურის გამომცემლობის ბანერი ავიდა გერგეთის მთაზე, რომელიც ზღვის დონიდან 2200 მეტრზე მდებარეობს. უამრავი ადგილობრივი და უცხოელი ვიზიტორის ყურადღება მიიპყრო იმ მოხალისეებმა, რომლებიც რამდენიმე წუთის განმავლობაში, სიცივეში, გერგეთის სამების ეზოში კითხულობდნენ ბაკურ სულაკაურის გამომცემლობის წიგნებს.

ავტორი: 
ჟურნალისტი – ელენე გოგბერაშვილი

#5 აქტივობა :

„იგრძენი წიგნის გულისცემამ“ დიდი საქმე გასწია კითხვამოწყურებულ და კითხვით „გამძღარ“ კაცებში და ქალებში ჩვენი მეგობრის „ბაკურ სულაკაურის გამომცემლობის“ ხოტბით შემკობის მიზნით და გადაწყვიტა დაესვენა ამ დიდ დღესასწაულს, საქართველოს დამოუკიდებლობის დღეს.

ორად გაიყო ჩვენი გუნდის გზები. ერთნი წავიდნენ ყაზბეგის ულამაზესი მთებისკენ, ხოლო მეორენი გაუდგნენ მარტყოფის გზასა.

ამბავი ჩემი აღწერს სწორედ მარტყოფში გამართულ ქეიფსა და დროს ტარებას.

მშვენიერი დილა გათენდა ოცდაექვსსა მაისსა და „იგრძენი წიგნის გულისცემა“ გაუდგა გზასა მარტყოფისკენ. ბევრი იარა თუ ცოტა იარა, მიადგა მშვენიერ ადგილსა, რომელსა ერქვა ღვთაება. განა შეიძლება ამ ღვთაებრივ ადგილს სხვა სახელი ეწოდოს?

მოვინახულეთ ანტონ მარტყოფელის სვეტი, საიდანაც მოჩანდა მთელი საქართველო, იმ წამს ჩვენ ასე გვეგონა, რადგან ემოციებმა და განცდებმა შეგვიპყრო. აგრეთვე მკაფიოდ დავინახეთ თბილისის ზღვა და გლდანის რომელიღაც „უმშვენიერესი“ მიკრორაიონი, რამაც ჩვენი განცდები ერთი ათად გაამრავლა.

არაერთი „ვერსტის“ გავლის შემდეგ მოვიდა ნანატრი ქეიფის ჟამი. ოსტატურად მომზადებულმა მწვადმა და აფხაზეთში გამოხდილმა არაყმა, სიმბოლურად გაგვაერთიანა ამ შესანიშნავ და ყურადსაღებ დღეს. მაგრამ ჩვენი გუნდი რისი „იგრძენი წიგნის გულისცემა“ იქნებოდა განსაკუთრებული განწყობა, რომ არ შეექმნა მოქეიფეებისთვის? და გაიმართა სადღეგრძელოების შეჯიბრი. და მოისმინა იქა მყოფმა ხალხმა არაერთი ბრწყინვალე, პატრიოტული, სალაღობო, მხიარული, მწუხარებით და სიყვარულით აღსავსე ჭეშმარიტი ქართული სადღეგრძელო. და გამოვლინდა 3 გამარჯვებული, რომლებიც დაჯილდოვდნენ „ბაკურ სულაკაურის გამომცემლობის“ ფასდაკლების ბარათებით.

პირველი გამარჯვებული – ილიას უნივერსიტეტის ლექტორი და საზოგადოებრივი ურთიერთობის მართვის სპეციალისტი         არჩილ გამზარდია

მეორე გამარჯვებული – ილიას უნივერსიტეტის მე–4 კურსის სტუდენტი სანდრო გულიაშვილი

მესამე გამარჯვებული – ბექა ჭანკოთაძე

ასეა ძვირფასო მკითხველო, ჩვენი მეგობარი არა მხოლოდ ლამაზ და საინტერესო წიგნებს გვთავაზობს, არამედ ხელს უწყობს აუცილებელი ჭეშმარიტი ქართული ტრადიციების შენარჩუნებასა და განვითარებას.  

#6 აქტივობა :


გადავწყვიტეთ, რომ ამ კვირაში გადაგვეღო რეკლამა "ბაკურ სულაკაურის გამომცემლობა – XXI საუკუნის კუპიდონი", რომელიც ერთ დღეში გახდა ჰიტი :)

როგორც ჩანს, გუნდი კრეატიულობით გამოირჩევა, მას ნამდვილად აქვს რეგულარულად და თანმიმდევრულად დაგეგმილი პიარკამპანია, რასაც აქვს კიდეც ეფექტი. გუნდი მიზანს, წიგნის კითხვის მოტივაცია შეუქმნას ახალგაზრდებს, ამართლებს. ამის დასტური გუნდის აქამდე ჩატარებული ღონისძიებების სახითაც არსებობს. ეს არის გუნდი, რომლის მეშვეობით ბაკურ სულაკაურის გამომცემლობამ  ჩააღწია სანატრელ აფხაზეთში. ამ გუნდს კარგად იცნობენ ქუთაისში, ღვთაებაში, თბილისში და უკვე სტეფანწმინდაშიც. ეს მხოლოდ დასაწყისია,  გუნდი კიდევ უფრო კარგ ღონისძიებებს გეგმავს.                                                       

                                                        ავტორი: 

ჟურნალისტი – ელენე გოგბერაშვილი