კვირა 4

შიმშილის თამაშები (დავალება)

ამ კვირის დავალებად "ბაკურ სულაკაურის გამომცემლობამ" მოგვცა თემა – "შიმშილის თამაშები" და გვითხრა:  "რას გააკეთებთ ამ წიგნთან დაკავშირებით, თქვენი გადასაწყვეტიაო". 

ჰოდა ჩვენც გადავწყვიტეთ, რომ ამ წიგნის გმირები – ქეთნი და პიტა მე–12 რაიონიდან მატარებლით დედაქალაქში ჩამოგვეყვანა და ქართველებისთვის საჩუქარი გაგვეკეთებინა. 

2 ივნისს 20:00_ზე მატარებელი (პანემის დედაქალაქს არა და.. :) ) თბილისს მოუახლოვდა და პიტა და ქეთნი სადგურის მოედანზე ჩამოვიდნენ. მათ დახვდნენ ჩვენი პაპარაცები და გადაუღეს ფოტოები. ამან იქ მყოფი ხალხი ძალიან გააკვირვა.

შემდეგ ქეთნი და პიტა ხელებჩაკიდებულები მარჯანიშვილის მოედნისაკენ დაიძრენ და დავით აღმაშენებლის გამზირი ფეხით გაიარეს. მათ წინ ჩვენი მოხალისეები მიუძღოდნენ და ხალხს ამცნობდნენ მათ ჩამოსვლას. ყველა გააკვირვა ამ ამბავმა. ბოლოს ჩვენი გმირები იქვე პარკში გაჩერდნენ და იპოზიორეს. 

ბოლოს გადავწყვიტეთ, რომ მათ მიერ ჩამოტანილი წიგნი –  "შიმშილის თამაშები" გაგვეთამაშებინა. ამასთანავე გავათამაშეთ ფასდაკლების ბარათები. ორივე საჩუქარი ერთ–ერთმა აქტიურმა მონაწილემ მოიგო და ძალიან ბედნიერი დარჩა :) 

"ეკო კრეატივი"

3 ივნისს არასამთავრობო ორგანიზაციათა კოალიციამ ( "თბილისის სკაუტური მოძრაობა", "CSDC", "ჰელფინგ ჰენდ", "დრონი", "მწვანე უნი", "ტარტი") მსოფლიო ბანკის ფინანსური მხარდაჭერით მზიურის პარკში გამართა ეკო თამაში – "იპოვე განძი", სადაც "იგრძენი წიგნის გულისცემა" იყო მიწვეული. მონაწილეები იყვნენ თბილისის სხვადასხვა სკოლის მოსწავლეები და სტუდენტები. ისინი გაიყვნენ გუნდებად და დაიწყო თამაში.

მათ ეძლეოდათ გარკვეული სახის დავალებები, რომელთა შესრულების შემდეგ თანდათან უახლოვდებოდნენ განძს. განძი კი იყო ბაკურ სულაკაურის გამომცემლობის ფასდაკლების ბარათების დიდი რაოდენობა და სხვა საჩუქრები. ასევე გამარჯვებულ გუნდს პროექტის მეორე ეტაპზე 5 ივნისს გადავცემთ წიგნებს.

თამაში მართლაც საინტერესო და სახალისო გამოდგა და გაიმარჯვა თბილისის 154 საჯარო სკოლის გუნდმა "ნიკემ". მონაწილეები ძალიან გაერთნენ, თუმცა დამარცხებულებს გული დაწყდათ, რომ ვერ გაიმარჯვეს. "იგრძენი წიგნის გულისცემამ" მათაც გაუხარა გული და გადავეცით ფასდაკლების ბარათები.

თამაშმა დიდი ყურადღება მიიქცია გამვლელთა შორისაც, რომლებიც დიდი ინტერესით გვადევნებდნენ თვალს და აინტერესებდათ რა იყო განძი :)

ძალიან გაგვიკვირდა, როცა ბენეფიციართა შორის პროექტ "წიგნების თაობას" ერთ–ერთი მონაწილე აღმოვაჩინეთ. მან წარმატებები უსურვა ჩვენს გუნდს და მადლობა გადაგვიხადა საჩუქრისათვის.

"იგრძენი წიგნის გულისცემა" მადლობას უხდის ექვსივე არასამთავრობო ორგანიზაციას და გამოთქვამს მზადყოფნას შემდგომშიც დაეხმაროს სხვა ორგანიზაციებს, თუ მათ ექნებათ სურვილი ჩვენთან თანამშრომლობისა.